శీర్షిక
భగవంతుడే బాధితుడు
బాధితురాలు భూదేవి భూభారం మొయ్యలేక
దుర్మార్గుల భారం తగ్గించమని వేడుకుంది
భగవంతుణ్ని!
నారాయణుడు శ్రీకృష్ణుడిగా అవతారమెత్తాడు
భూలోకంలో దుర్మార్గపు భక్తుల కోసం బాధితుడయ్యాడు!
దుర్మార్గుల చేతిలో దెబ్బలు తిన్నాడు..
తిరిగి తన్నాడు..
భక్తి ప్రేమపాశానికి.. బద్ధుడై పూదోటలో
బందీగా ఉన్నాడు!
వేణువును ఊదాడు.. గోవులను కాచాడు..
ఆటలాడాడు, పాటలూ
పాడాడు.. చిలిపి చేష్టలు చేసి
కొంటెవాడనీ అనిపించుకొన్నాడు!
భక్తులకోసం బాధితుడవడం తనకు ఆనందమన్నాడు!
భక్తులతో కలిసి పప్పు రుబ్బాడు.. పిండి
విసిరాడు.
ఆర్తితో ఆపదలో మొరపెట్టుకొన్న ద్రౌపది
కష్టాలకి
బాధ పడ్డాడు.. వలువలిచ్చి ఆదుకున్నాడు..
బాల్యంలో వెన్న దొంగిలించాడు.. గోపికల వస్త్రాలు
అపహరించి.. చోరుడుగా పేరుపడ్డాడు!
భక్తులకోసం బాధితుడవడం తనకు ఆనందమన్నాడు!
ద్వారకాధీశుడై శమంతకమణిని అపహరించి...
ప్రసేనుడిని సంహరించాడనే నింద మోశాడు!
శిశుపాలుడు, కంసుడు,జరాసంధుడు, బాణాసురుడు..
వంటి దుష్ట రాజులెందరినో సంహరించాడు..
పాండవ పక్షపాతిగా ముద్ర వేయించుకున్నాడు..
భక్తులకోసం బాధితుడవడం తనకు ఆనందమన్నాడు!
ఎంగిళ్ళు తిన్నాడు.. క్షవర కర్మ కూడ చేశాడు
సంసారిగా జీవించాడు.. భోగిగా కనిపించాడు
మహాయోగీశ్వరుడిగా పరిగణింపబడ్డాడు
గురుసేవలు చేశాడు.. బ్రాహ్మణుల పాదాలు
కడిగాడు
భక్తులకోసం బాధితుడవడం తనకు ఆనందమన్నాడు!
నిందలను మోసాడు.. దూషింపబడ్డాడు
సామాన్యుడిగా మసలాడు.. జగద్గురువుగా
వినుతికెక్కాడు
ఆనందరూపుడై అలరించాడు.. ఆనందాన్ని పంచిపెట్టాడు..
ఙ్ఞాన స్వరూపుడై ఙ్ఞానకాంతులను
విరజిమ్మాడు..
శాంతికాముడై ధర్మ స్థాపనకు ఉద్యమించాడు..
భక్తులకోసం బాధితుడవడం తనకు ఆనందమన్నాడు!
ప్రహ్లాదుడి బాధలు స్వయంగా అనుభవించాడు..
గజేంద్రుడి మోక్షం కోసం తాపత్రయపడ్డాడు!
భక్తుల బాధ తానే అనుభవించి..భక్తికి
లొంగి ఆదున్నాడు!
వేలమంది రాచకన్యల్ని వివాహమాడాడు
జారుడుగా, బహుపెద్ద
సంసారిగా పరిహసింపబడ్డాడు!
భక్తులకోసం బాధితుడవడం తనకు ఆనందమన్నాడు!
రాజనీతిని పాటించాడు.. రాజకీయ వ్యవహారాలూ..
నడిపించాడు.. రాయబారం చేశాడు..
మహాభారత యుద్ధానికి కారకుడన్న నింద
మోశాడు!
తానెన్నో ఇక్కట్లు
పడ్డాడు.. మంచి చెడులకి అక్కరకి వచ్చాడు
భక్తులకోసం బాధితుడవడం తనకు ఆనందమన్నాడు!
భూదేవి కోరిక గౌరవించాడు.. భూమికి భారం
తగ్గించాడు
వచ్చిన పని పూర్తి చేశాడు... అవతార సమాప్తికి
సిద్ధమయ్యాడు
పిలిస్తే
పరమాత్మ పరుగెత్తి వస్తాడు ... భక్తులకోసం
బాధితుడవుతాడు!
No comments:
Post a Comment