అవసరానికి వాడుకో..ఆనక విసిరెయ్యి
అటకవైపు చూస్తుంటే
ఆనందం...తరతరాల సంపద
తాతలనాటి సామాను..వెలకట్ట
వీలుకానిది
హృదయంలో పదిల పరుచుకున్న
ఆత్మీయుల్ని తలుచుకుని
అనందించి..పరవశించి మళ్ళీ
అటకమీద పదిల పరిచినప్పుడు
పెద్ద తరంతో కలిసిన
ఉమ్మడి కుటుంబంతో...
వచ్చిపోయే
బంధువులతో..అనురగంతో పలకరించే ఆత్మీయులతో
కేరింతలతో ఆరోగ్యంగా
పెరుగుతున్న మరో తరం
చెదకి అందని
గట్టితనంతో...చూడగానే అనందాన్ని పెంచుతూ
శరీరానికి ఆరోగ్యం, బుద్ధికి
వికాసం, మెదడుకి జ్ఞానం, పరిపూర్ణమైన వ్యక్తిత్వం
నిండు ఆయుష్షు .. ఇవి
కూడా తరతరాల సంపదే!
వంశ చరిత్రె తెలియని
వాళ్ళకి దేశ చరిత్ర ఏం తెలుస్తుంది?
నా వంశ వృక్షానికి నేను
కూడా అందిస్తాను మంచి ఫలాలు
ఇది ఆనాటి మాట! మరి
ఇప్పుడో...
అవసరానికి వాడుకో..! ఆనక
విసిరెయ్యి!
వాడుకున్నాక వదిలించుకో
అన్నమాటకి శ్రీకారం చుట్టేసి
తరతరాలుగా పదిల పరుచుకున్న
జ్ఞాపకాల్ని...
అటకదించి...బజారుకి అమ్మకానికి
మళ్ళిస్తే ..
అవసరానికి మించిన ఆధునికత
ఇల్లంతా వాడుకుంటోంది
పెరుగుతున్న మరోతరం
ముందుకొచ్చి
అవసరానికి వాడుకో...ఆనక
విసిరెయ్యి! అనే మాట వస్తువులకే కాదని
వృద్ధులైన
తల్లితండ్రులవైపు సాలోచనగా చూసి..
వదిలించుకోవలసిన అవసరం
ఎంతైనా ఉందని
వట్టిపోయిన పశువుల్ని
ట్రక్కులోకి ఎక్కించి పాకల్లోంచి తరిమినట్టు
ఆటోలో ఎక్కించి
వృద్ధాశ్రమాల్లోకి తరుముతోంది
అదే తీరు తన దాక వచ్చాక
తల్లితండ్రులు గుర్తుకొచ్చి వృద్ధాశ్రమం వైపు పరుగెడితే
ఇచ్చినవన్నీ వాడుకుని ఇంక
ఇచ్చేవాళ్ళెవరూ లేరని వదిలించుకున్నాం పొమ్మంటోంది
విరిసిన ప్రతి పువ్వుకి
పొద్దు తిరుగుడు తప్పదని
పొద్దు తిరిగిన పువ్వుని
పదిల పరిచి దాచుకుంటే
వంశవృక్షం పెద్దదై
చరిత్రనే సృష్టిస్తుంది!!
No comments:
Post a Comment