నాన్నమ్మ చెప్పిన పావురాల కథ

   “నాన్నమ్మా! నాన్నమ్మా!” అంటూ పరుగెత్తుకొచ్చాడు నందు.

   ““ఏమిట్రా! చెప్పు..” అంది నాన్నమ్మ.

   ““మరేమో నాన్నమ్మా! ఇవాళ పార్కులో బుజ్జి పావురాలు చూశాను. గుంపులు గుంపులుగా ఎంచక్క ఎగురుతున్నాయో..! ఇవాళ మాకు పావురాల కథ చెప్తావా నాన్నమ్మ?”” అని అడిగాడు.

   ““అలాగేలేరా! అందర్నీ రమ్మను. మళ్లీ రాత్రి ఆలస్యంగా పడుక్కుంటారు”” అంది నాన్నమ్మ వాడి సంతోషానికి మురిసిపోతూ.

   నందు ఆనందంగా పరుగెత్తాడు. ““ఈ రోజు పావురాల కథోచ్! నేనే అడిగాను నాన్నమ్మని!””  గొప్పగా చెప్పాడు.

   అంతే! పిల్లలందరూ బిలబిల్లాడుతూ వచ్చేశారు.

   నాన్నమ్మ కథ చెప్పడం ప్రారంభించింది. “ఒకసారి పావురాలన్నీ కలిసి అహారం వెతుక్కుంటూ బయలుదేరాయి. ఆ పావురాల గుంపుకి ఒక నాయకుడున్నాడు. నాయకుడు ఎటువైపుకి వెళ్లమంటే అటువైపుకి ఎగురుతున్నాయి.

   ఎంత దూరం వెళ్లినా వాటికి ఆహారం దొరకలేదు.అందులో ఒక చిన్న పావురం ““నేనింక ఎగరలేకపోతున్నాను. కొంచెంసేపు విశ్రాంతి తీసుకుని మళ్లీ బయలుదేరుదామా?”” అని అడిగింది.

   దాని మాటలు విని నాయకుడు “ఇంకొంచెం దూరం వెళ్లాక ఆగుదాం! ఇక్కడొద్దు!”” అన్నాడు.

   పావురాలన్నీ అలా ఎగురుతూనే ఉన్నాయి. ““కింద ఆహారం కనిపిస్తోంది. అక్కడ కిందకి దిగిదామా?” అనడిగింది మరో పావురం.

   దాని మాటలు విని ““అయ్యయ్యో! అది ఆహారం కాదు. అక్కడ వేటగాడు వలపన్నాడు. ఇక్కడ దిగితే వలలో చిక్కుకుని పోతారు. అప్పుడు వేటగాడు మిమ్మల్ని చంపి తినేస్తాడు”” అన్నాడు కంగారుగా.

   ఆకలితో ఉన్న పావురాలు నాయకుడి మాటలు వినలేదు. అన్నీ ఒకేసారి కిందకి దిగేసాయి. నాయకుడు చెప్పినట్టే వలలో చిక్కుకున్నాయి.

   భయంతో నాయకుడి వైపు చూశాయి. ““తప్పయిపోయింది. మీరు చెప్పినట్టు వినక కోరి కష్టాలు తెచ్చుకున్నాం. వేటగాడు వచ్చేలోగా మమ్మల్ని ఈ వలలోంచి తప్పించండి!” అని వేడుకున్నాయి అసలే ఆకలి బాధతో ఉన్న పావురాలు.

   వాటిని చూసి నాయకుడికి బాధేసింది. “‘పాపం! బాగా అకలేసి ఉంటుంది”’ అనుకున్నాడు.

   పావురాలతో ““భయపడకండి! నేను మిమ్మల్ని రక్షిస్తాను! మీరందరూ కలిసి వలతో సహా పైకి ఎగరండి. నా వెనకలే రండి. నాకొక స్నేహితుడున్నాడు. వాడు మిమ్మల్ని రక్షిస్తాడు”” అన్నాడు.

   పావురాలన్నీ వలతో సహా ఒకేసారి పైకి ఎగిరి నాయకుడి వెనకాలే వెళ్లాయి.

   నాయకుడు వాళ్లని తిసుకుని తన స్నేహితుడు ఎలుక దగ్గరికి తీసుకుని వెళ్లాడు. స్నేహితుడు రావడం చూసి ఎలుక అతడికి ఎదురు వెళ్లింది. పావురాలన్నీ నాయకుడి వెనకలే వలతో సహా కిందకి దిగాయి.

   ఎలుక తన పదునైన పళ్లతో వలతాళ్లు కొరికేసింది. పావురాలన్నీ వలలోంచి బయటికి వచ్చేశాయి.

   తన స్నేహితుడితో వచ్చిన పావురాలన్నింటికీ ఆహారం పెట్టింది ఎలుక. అందర్నీ రక్షించి ఆహారాన్ని పెట్టినందుకు ఎలుకకి, తమ నాయకుడికి మప్పితాలు తెలియచేసుకున్నాయి.

   తమ క్షేమాన్ని కోరేవాడు నాయకుడు కాబట్టి, ఇంకెప్పుడూ నాయకుడు చెప్పినట్టు నడుచుకోవాలని పావురాలన్నీ నిర్ణయించుకున్నాయి” అంటూ నాన్నమ్మ కథ ముగించింది.

    “అదర్రా పావురాల కథ! సమర్థుడైన నాయకుణ్ని ఎంచుకోవాలి. అలా ఎంచుకోబడిన నాయకుడు తనను నమ్ముకున్న ప్రజాక్షేమాన్ని కోరాలి. నాయకుడు సమర్థుడై ప్రజల మంచిని కోరుకోవాలి

   నాయకుడు సమర్థుడైతే ఆ నాయకుడి అండలో ప్రజలు ప్రశాంతంగా జీవించవచ్చు.

   సరే మరి! అందరూ ఆవులిస్తున్నారు. “ఇంక కథ రేపటికి... మనం నిద్రలోకి!”” అంటూ గట్టిగా ఆవులిస్తూ నిద్రలోకి జారిపోయింది నాన్నమ్మ.

   నందుకి కథ నచ్చింది. నాన్నమ్మతో మంచికథ చెప్పినందుకు హీరోలా ఫీలవుతూ... ‘అందరూ పడుక్కోండి!’ అని చెప్పి తనుమాత్రం నాన్నమ్మ పక్కన పడుక్కున్నాడు.